دنيا تغر الناس واللي امصافين ... ياما أودعت بين الرفاقة شتاتِ
مرحوم يا اللي كل يوم ينادين ... لي شافني عنده يزيد افرحاتِ
قعدت عنده يوم دلا يحاكين ... وأبدى السراير يوم جاب اعبراتي
ماهيب عادة يغرق الدمع للعين ... الا محس عند قرب المماتِ
قلت: الصبر يا بو محمد وممدين ... والله هو اللي عنده الصالحاتِ
قال: إيه أنا صابر وربعي وفيين ... الله يسامح كل من كان يأتي
والموت ما به شك لازم يوافين ... والله هو اللي عالم الخافياتِ
هذا وأنا قلبي من الهم يلوين ... من يوم دلا يذكر المخلفاتِ
الموت حق ولامن الحق جز عين ... ولا عندنا شك بقرب الوفاةِ
عساك يا الهاشل مع المستظلين ... تحت ظلال العرش بالوافياتِ
عساك بالفردوس روح ورياحين ... عساك بعفو الله بكل الهناةِ
الله يسامح عنك أول وهالحين ... وإيسكنك جناته الواسعاتِ
مالك عيال يفقدونك مصغرين ... ولا بنات بالدجا باكياتِ
ولا لك من التجار ناس ديايين ... اللي يبون احقوقهم كاملاتِ
والله هو اللي يرحم اللي مذنبين ... ويبدل السيآت لك بحسناتِ
الله يثيبك يوم نشر الدواوين ... ويجعل كتابك في يمينك ثباتِ
الله ينتقل كفتك بالموازين ... ويجعل حسناتك هن الراجحاتِ
عساك يوم العرض من المستريحين ... عساك عقب الفقر بأكبر غناةِ
أنت الرفيق اللي على العسر واللين ... والحي منا يذكرك بالحياةِ
أنا أشهد أنك صاحب الحق والدين ... وأنا أشهد أنك من يحب الصلاةِ
هذا وصلوا عدما يورق التين ... على محمد صاحب المعجزاتِ