وقال بعنوان: (مركب خيال):
أنا أقول الشعر لعيونك لحالك ... اباصنع من أبيات الشعر مركب
أبا بحر في بحر حبك واغني ... واجر الصوت لين الموج يطرب
أسافر في بحر حبك ليالي ... أجدف في بحر حبك ولا أتعب
ألاقي في بحر حبك شواطي ... بها من كل صنف طير يطرب
يغني للهوى صوت يخلي ... غصون الورد ترقص لين تتعب
أحط أرحال قلبي في ثراها ... واخلي قلبي العطشان يشرب
والى مني رويت وشفت حولي ... لقيت الريم حول الروض يلعب
عنود ناحل يازين عوده ... غنوج عارف أصله معَرّب
أحدق في عيونه ويتراوي ... حنين الشوق بعيونه تلهّب
أقرب حول لمسه ثم يبعد ... والى مني رجعت شوي قرب
أسبّل له عيوني ثم يدني ... يذوقني عسل لا شك وأعذب
وإلى مني فتحت عيني ما لقيته ... اثاري الصبح جا والليل غرَّب
أعود بمركبي فرح واغني ... واعرف انه خيال بس يعجب
وأبيات:
هاجس
لي هاجس كل وقت دوم يطري لي ... أحاول أنساه لكن ما تهيا لي
دايم على طول الأيام يبري لي ... يمشي معي كل درب كنه ظلالي
يقول لي هاجسي اني عندها غالي ... لكن اتداري تعرف الناس عذال
ما دري كلام يقوله راحم حالي ... وما دري غلاها على وإلا يتراوي لي