شربت العلاج اللي مقرر بخمس أكواب ... ولا فاد في حالي ولا هوب مشافيها
رْكَبْنا على الممشى تقل يقضبَهْ قضاب ... والى جيت أبقعد ما قدرنا نثنيها
ترى العمر ما يبطي وهو طالبه طلاب ... أرواح تموت، وتنقبض بيد واليها
تذكرت وقتي يوم أنا جاهلٍ لَعَّاب ... سنينٍ تشوّقني ولانيب ناسيها
* * *
ألا يا وجودي وجد عودٍ عليه رقاب ... جلا عن دياره عقب ماهوب يغليها
تنصّا ديارٍ حاكمه كافر نصاب ... تكض الزعل بحلوقها والبلا فيها
يجر البليهي ونةٍ من ثلاث وجاب ... كماونة اللي مات بالحرب غاليها
أنا يوم طحت من المرض قَلَّوْا الاصحاب ... جنود تغوش وحاجتي ما تقضيها
الا يا خسارة سكبة الحقن والأشناب ... وجيهٍ على الخيبة ولانيب راجيها
قصتنا الأمور وخاطري من زمانه طاب ... مثل ما تطيب النفس من شوف غاليها
رضيت الزهيد ولا عن القاصرة منجاب ... أخذته من أيدين تمده وتطريها
أنا مطلب وقتي ولا عاد لي مطلاب ... مثل من غزا وانكف ذلوله مذكِّيها
ترك فاطره في ديرة الخوف والأجناب ... أخذ خرجها وقفي وعينه تراعيها
يا شين الحياة اللي تحدك على الأقراب ... حياة الشقا، دايم غثاها يباريها
بركت وثويت ولا نقوم على المصلاب ... وتلقيت سندا ماشيات ذواريها
أبصبر وراع الصبر عند الولي ما خاب ... على جوع وسنين رديه نمضيها
وقال يخاطب ابنه فهدًا:
الا يا فهد يا طول ليل الشتا طولاه ... يا طوله على عين سهرها مطاولها
ولا من صديقٍ يوم شان الزمان انصاه ... صديقي قابلك يوم منت قبايلها
عسى الله يعينك في زمانٍ ثقل ما طاه ... يعقب الهلاس وطيب الناس مزملها
ابا اصبر على جوره وبا أصبر على بلواه ... أرواح البشر في دبرة السرب كافلها
أبات القوى، وأصبح على الجوع واشيباه ... وصلت القبور اللي تالمع نصايلها