وايمانهم بالحق دايم طويله … والحمد لله عاثرا كل من خان
لا عاش من يجحد ثناهم وينساه … من رامهم قصوا عن البغي يمناه
ويلقى الجزا من باع دينه بدنياه … مثل المصير اللي وقع فيه ندمان
عيوا على العليا ثقيلين الارواز … والكل منهم كنه الحيد ميهاز
واللي ضميره صايبه غش وانحاز … بالسيف الاملح عالجوا كل طنيانه
واعد من وايل صناديد عتبه … صوارم روس المعالي رقت به
من يكتب التاريخ سجل بكتبه … يشهد لهم الهدار وعيال بدران
بجايده من عقب صبحي جميلات … من دور جابر والسنين القديمات
من لابة السلقا مشايخ وسادات … شيخان تورث طايل المجد شيخان
تاريخهم يذكر بكل النواحي … وانسابهم ما يجهله كل صاحي
انشد وتلقى من يعد الصباحي … بجايده من صلب عمار جملان
فاضوا من الهدار لأرض الزباره … وجو للكويت واسسوا به اماره
بالسيف والمنسف وحسن الاداره … دانت لهم سادات حضره وبدوان
من الاحمدي للسالمي للشقايا … ومن ديرة البصره لحد الزوايا
بالسيف جتهم ماخذوها هدايا … وحدودهم من فيلكا لأرض سفوان
تشهد عليهم فرسها مع عربها … فعل اخو مريم بالفخر ماحسبها
اسرة شرف معروف طارى نسبها … ما عندهم عن معدن الساس نسيان
واعد لمحه عن صوارم خليفه … عيال فيصل والمناسب شريفه
من عزوة الرباع ماهم لفيفه … فوق النجايب هددوا عرش ايران
لهم على عوج اللغايا زعامه … مثل العلم من فوق راس العلامه
أحمد فتح بالسيف دار المنامه … طال السنام واورث المجد شجعان
حاموا على البحرين من جيش الاعجام … تاريخهم يصعد على المجد قدام