تهنئة من الدوّاي لأمير البحرين صاحب السمو الشيخ عيسى بن سلمان آل خليفة
سلام يا قصر بعيطٍ منيفه … تنسف عليه من الخليج الذواري
قصر الرفاع اللي جميل وصيفه … راعيه في نطح المواجيب ضاري
تأمن حدر ساسه قلوب مخيفه … بالسيف والمنسف ورأي اجباري
يا الله يا منشي المزون بقنيفه … يا جادي ياللي في دجى الليل ساري
ياعل بن سلمان عيسى الخليفه … يساعفه في كل درب المباري
واخوانه اللي كل أبوهم بكيفه … لطامة العايل نهار المثاري
كم واحد خلوه يضرب صنيفه … القاع عقب مفايله بالسواري
عود من الطمعات نفسه معيفه … وربعه لأهلهم ناكسين وقاري
ياما حلا يابو حمد عقب صيفه … ليا ذعذع الغربي ليالي الصفاري
وقلت لصقاقير نفوس خفيفه … يطلعون اللي يضد المماري
وكل اشقرٍ راع النظر ما يعيفه … تلقى عليه من الدلايل مواري
راسه كما الفنجال صينٍ لصيفه … اشقر وكفه شبر والريش عاري
ونزلت بين الدبدبة والحتيفه … في خايع فقع وعشب وخباري
للي مثل شرواك ونسه وكيفه … وربع مشاكيل وريم وحباري