لاني بسباق ولا نيب منعاق … عن ما كتب بالخفاء والبياني
ولاني بلقاق ولا نيب عقاق … راضي بقسمت ربي اللي عطاني
ومن عقب هذا البال والفكر مشتاق … لنظم القوافي من حلي المعاني
إلى بغيت آخذ مع القاف طوارق … القاه ما جود بطارف الساني
آخذ منه ما كان جائز وما لاق … ارمي اهزا له وآخذ اسماني
ثم أنظمه وأنا على الزين شفاق … نظم الخرز برقاب نجل العياني
أوصيك ياللي للنبا الزين فراق … اسمع كلامي يا عريب المجاني
عليك ياللي للنواميس عشاق … هميلع من مطلقين اليماني
لو كان حمله مثل ما قيل ما يطاق … يصبر على الشدة وسيع البطاني
أطيب ما يجلب ويشراء بالأسواق … ولا ينكسب الهيلمه والتصاني
وحذراك عن رفقة هذور وملاق … مع الخيانة بالقفاء مسر داني
لا تأمنه لو يعطيك ميثاق … ما ينعرف له مذب قلباني
ولأجل مكتوب بخطه بالأعناق … الرب حي وكل مخلوق فاني
ما يقتلك لوجاك تسعين تيفاق … الا اليا صار أجلك بالأسباب داني
تبقى لموعد يومك اللي بالأراق … لا سابقه ساعة ولا أنت امتواني
فيالله وأنا طالبك في حسن تيفاق … ترحم حوال اللي هزيل اواني
أسألك اليا من التفت الساق بالساق … في ماقف ما بيننا ترجماني
والناس من بين الصراطين مراق … وكل اكتابه بين عينيه باني
والنفس معها شاهدين وسواق … فيارب عن لفح الجحيم اتحماني
هذا يمره بالعجل لمح خفاق … هذا كما الرجلى وذاك احبياني
وهذا على حفرة زمهرير خفاق … وهذاك مامون بخضر الجناني
وأسألك تامرا لوالديني بالاعتاق … من النار حيثك ربي المستعاني
والمسلمين اللي على الحق شفاق … أسألك لا تجعل لهم به مكاني
واللى يصلون الفرايض والاشراق … ومن حج بيت الله وصام ارمضاني
وأداء الزكاة وقام عدل ولا باق … تكتب لهم منها براءة وأماني
تمت وصلى الله على حسن الأخلاق … نبينا سيد جميع الكياني