دنيا كفا الله شرها ننخدع له … الطيب سندا والمرجل تعابي
من جاه بالقوة لزوم يقع له … عقب التبين ناضعه للترابي
ياما وياما خسرت من جمع له … تبرم دواليب الشقا بانقلابي
ان اقبلت كلٍ براسه خضع له … تضحك لعشاق الهواء بالعذابي
وان دبرت داسة رفيقه بنعله … تسقيه كدرٍ عقب حلو الشرابي
دنياك من زلت عنه ما رجع له … تقفته بمذلقات الحرابي
لا صار ما طبعك على الدرب طع له … اصبرو قل يالله عليك الثوابي
ملزوم تدبير الولي نمتنع له … منزل على صدر الرسول الكتابي
واحذر طريق إبليس لا تتبع له … واتعب على العليا بعصر الشبابي
ماكل هُرْج نسمعه نستمع له … ولا كل من يسأل يعرف الجوابي
ولا كل من يفعل يوفق بفعله … ولا كل من وصي على الطيب طابي
ولا كل من ينخا رفيق فزع له … كم وارد غره لميع السرابي
بعض البروق توهم اللي نجع له … ترعد ونوه ما يبل الترابي
ومن غاف قربك جنبه لا تهزع له … لا تتبع المقفي تقع بالمثابي
اللاش ما يفيدك بلياه جعله … عسى جنابه للفنا والخرابي
خسران يبشر بالفلس من ربع له … مثل الغشيم اللي قنص بالغرابي
لاطلّعه وقت الهدد ما طلع له … يتلى الطمان ومن تلا الهون خابي
ولا تفيد خلان الرخا من وقع له … كلٍ إلى شاف الخسارة يهابي
احذرك لا تمشي مع اللاش دع له … ولا ترافق الخاين ردي الجنابي
لون قرش عندكم ينقطع له … تلقي وريده يا فتي الجود حابي
عليك باللي يرفع الراس فعله … رخص بماله بالليالي الصعابي
اللي مراقيب العلا يندفع له … على عوايد مدرك الطيب رابي
وجماعته عند القبائل زرع له … ومن حشمته تحشم وجيه غيابي