وقال رظا بن طارف الشمَّري:
البارحة ماغملج الجفن بنعوس … وعيني قزت من نومها وتغميضه
واسكت وبيه يافتى الجود محسوس … ومن شاف حالي قال حالك مريضه
وهيضت قيل بالصناديق محبوس … ولومي على اللي لامني بتهييضه
يديرها دالوب الافكار كردوس … يشدي جراد طار عقب تحويضه
انا الدي من ظيم الأيام متعوس … يضيق لو صدري مع العلم فيضه
أن همت درب يعترض دونه طعوس … ومراد بالي ما توصلت اريضه
دنيا تصارع من تحداه ببقوس … وتسقيه من مر الليالي عضيضه
ياما وياما بيدت كل سايوس … ما ينعرف كرخانّها من نقيضه
أيام تزهي لك لياليك بلبوس … مثل الهنوف اللي زهت بتغضيضه
ونوب تلحك لحت العود بالموس … وتبرى اللحم لو كان حالك غليظه
ودنياك لو ضده مفاليك بالعوس … والمشرع الصافي تبين خويضه
احذرك لا تجلد على قاع وعجوس … تر مقعد بالدار ما هي فريضة
اتل الهواء العامر أبي هب نسنوس … وخلك إلى فاض الهواءَ مع مفيضه
عشب الربيع إلى ظهر فيه عرنوس … عمره وصل والبدو قرب مقيضه
وان حلت لا تورد ظواميك لرسوس … خله تولي لا يغرك خضيضه
ان جيت له وارد تاديك بيبوس … انص العدودان كان دلوك غضيضه
وهم العلا لو عضك الوقت بضروس … تدرك مرام النفس لو عقب غيضه
المرجله بينه تقل ضو فانوس … من شام له لوبه خساير تعيضه
ومن لا يحصل باول العمر ناموس … مكاسبه بس الفلس والغميضه
واللاش لاش ولو ملك فلح وفلوس … لا قاضي حاجه ولا فيه عيضه
ما يفيد لوز وله مثل زول جاموس … جسمه كبير ولبت العقل بيضه
والي امتحنته يافتى الجود بدروس … تلقا حقايق فايله بتخفيضه
عليك باللي للخفيات سايوس … وان جالسك لاسرار قلبك حفيضه
وقت الرخا شرح وباضيق دبوس … ضرغام غابات يوحش جضيضه
يذري إلى هبت هبوب بها كوس … لا شفت غبران الوجيه البغيضه
ذا قول من قلبه من الوقت ملموس … وسوالف الدنيا طوال عريضه